Vieiros

Vieiros de meu Perfil


OUTRA VACA NO MILLO

A factura do hospital

10:09 13/04/2009

Na prédica do domingo pasado diciamos que diante da actual crise económica, os poderes públicos pouco ou nada poden facer mais ca afrouxar a carteira e asolagar de cartos as feridas do paciente por mor de mantelo con vida. Hoxe, cando Cristo ven de resucitar outra vez, lembrarémoslle ós fieis vieiristas que non ben o paciente saia desta imos ter que facerlle fronte á factura do hospital.

O profesor F. Mallo, na súa columna inaugural no Xornal de Galicia, advertía de que non vaia ser o demo que pasemos dunha crise provocada polo crédito privado a outra causada polo crédito público. Pois precisamente, para non chegar a esa estrema, debemos tomar conciencia dende xa que todo este gasto de emerxencia non é de balde, nin un maná agromado da nada, nin un agasallo dos deuses: é débeda pública, con xuros engadidos e con vencementos estipulados.

E como as recuperacións, agás as milagrosas, soen ser lentas, temos por diante anos de cinto apertado. Porque tal e como están as cousas, e sen pecar de pesimistas, é mais que probable que iniciemos o cambio de ciclo cun déficit público preto do 10%; e, pensando en volver a valores por debaixo do 3%, o camiño de volta semella ben complicado, no só pola súa larganza senón tamén porque a devandita reducción vai ter que ser a expensas só do recorte no gasto, xa que os ingresos marcharán parellos á marcha da futura recuperación e toda vez que xa case non quedan activos públicos que sacar á venda.

Calquera recorte no gasto é tarefa dura; dolorosa para os administrados e desagradecida para os administradores. Porque o gasto, unha vez nace, tende a perpetuarse no tempo indefinidamente, buscando apoios e complicidades aquí e acolá, inventando a cotío escusas para medrar ou, cando menos, para quedar como está. A diferencia do ingreso, que se non o regas e lle fas aloumiños todos os días pois aló vai, o gasto sobrevive aínda nas condicións máis adversas e extremas.  

4.48/5 (23 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Xosé Luís Sucasas

José Luís Sucasas

Naceu no ano 1959 en Cadrón, parroquia de tres lugares que son fronteira entre Lalín e Agolada. Na actualidade traballa de administrativo de obra no sector da construcción.



Máis opinións