Vieiros

Vieiros de meu Perfil


LUGAR DOS ROMANZINHOS

As medallas olímpicas

13:20 17/08/2008

Sen ánimo de xogar aos futuríbeis pódese prever que cando remate a Olimpiada de Pequín os medios de comunicación dirán que o resultado anuncia a emerxencia de China como unha grande potencia deportiva, só comparábel aos EEUU.

Mais non se limitarán a iso. Dirán tamén que o desenvolvimento da Olimpiada puxo máis unha vez de manifesto o declinio de Europa.
Non creo que perdan unha migalla de tempo, non o fixeron tampouco antes, en somar as medallas conseguidas polos Estados da Unión Europa. Con menos da metade da povoación de China e menos ainda se a este Estado lle achegamos os EEUU, os Estados da UE van conseguir máis medallas que as dúas “únicas potencias mundiais”.

De o faceren comprobarían que a 24 de agosto a Unión Europea conseguíu 86 medallas, frente ás 37 de China e as 44 dos EEUU. De momento, só se lles agregamos as 19 da Federación Rusa conseguen sobrepasar á UE.

Para estar por riba de China e EEUU non é preciso contar aos 27 Estados da UE. Abonda con considerar aos que están neste momento mellor situados: Alemaña, Italia, Eslovaquia e Franza, que xuntos teñen 45 medallas. Con algúns máis: Reino Unido, República Checa, Holanda, Romenia e o Estado español, chégase a 79.

A Unión Europea é a primeira potencia económica mundial, tamén a primeira potencia no deporte e en muitos outros campos, algúns deles respeitantes á solidariedade e o respeito dos direitos democráticos e humanos.

Porén, a ideoloxía dos Estados, refletida de modo especial nas interpretacións realizadas nos medios de comunicación, non permite enxergar unha realidade tan evidente. Esa ideoloxía, ao mesmo tempo chovinista e masoquista, nen siquer se permite facer unha excepción recoñecendo á UE nun campo tan determinante na autoestima como o do deporte.

3.74/5 (27 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Camilo Nogueira (foto pequena)

Camilo Nogueira

Camilo Nogueira Román naceu en Lavadores (Vigo) en 1936. Enxeñeiro industrial e economista, foi eurodeputado polo BNG entre os anos 1999 e 2004.



Máis opinións