Vieiros

Vieiros de meu Perfil


HAI QUE ROELO

Maiorías e minorías

12:45 25/09/2007

Este venres 28 será o Pleno de Política Xeral no Parlamento vasco. Agárdase que nel o lehendakari Ibarretxe dea algunha pista sobre un dos seus proxectos máis polémicos: unha consulta popular sobre o dereito da sociedade vasca a decidir o seu futuro. Un dos argumentos que empregan os contrarios a unha consulta é que divide á sociedade. A maioría das ocasións os partidos de ámbito español defenden, perante as ideas que propugnan os nacionalismos periféricos, a idea de que “dividen á sociedade”.

Mais xamais escoitamos a ninguén replicar a Rajoy que divide cando este promete que, se chega ao poder vai modificar a lei electoral para que os nacionalistas (cataláns, vascos ou galegos, porque semella como se o nacionalismo español non existise) teñan menor peso nas institucións. Desde o retorno da democracia, as urnas en Euskadi son teimudas: sempre hai no Parlamento vasco maiorías de nacionalistas vascos. E ata hoxe, a minoría de ámbito español sempre frenou as arelas de maior autogoberno. O chamado Plano Ibarretxe foi aprobado en Vitoria por maioría absoluta, como marcaba a Lei, e foi rexeitado en Madrid sen debate previo, se sequera ser tomado en consideración.

A democracia aséntase na división, e na arbitraxe desa división, no equilibrio das maiorías e as minorías. Un 51% é maioría. Pero en Euskadi o 43% que representan PP e PSE sempre detiveron calquera avance no autogoberno. A coesión social dos vascos non pode vir dunha imposición dunha maioría de adscripción vasca sobre a española, pero tampouco pode suceder o contrario.

Tamén se di que mentres exista ETA non se pode desenvolver unha consulta porque non hai liberdade plena, e iso é certo. Pero tamén o é que con ETA activa se aprobou o Estatuto de Gernika, fixéronse os referendos da Constitución española, da OTAN e da Constitución europea. Se a sociedade vasca agardara todas estas décadas polo que fixera ETA, non avanzararía ata onde avanzou. Non é probable que o lehendakari se decida a anunciar de xeito inmediato unha consulta. Probablemente propoña abrir un proceso de debate de varios meses para que haxa un consenso suficiente para desenvolvela no futuro. Pero hai quen teme que, unha vez máis, a minoría trate de bloquear esa iniciativa. Se tropezamos no mesmo atranco, que facemos?

4.79/5 (19 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Dani Álvarez

Dani Álvarez

Naceu nas Pontes en 1977. Marchou para Euskadi estudar Xornalismo. Logo de licenciarse, comezou a traballar en Radio Euskadi. Na actualidade dirixe o programa radiofónico "Ganbara", de información xeral e debate. Canda Xabier Lapitz coordinou o libro "Proceso de paz en Euskadi. 20 voces por la normalización".



Máis opinións