Vieiros

Vieiros de meu Perfil


Máis Alá

Xestionado por Vieiros
RSS de Máis Alá
ENTREGA DE PREMIOS DE FERVE A REDE

Venecia ben vale un relato

Marisol López, secretaria xeral de Política Lingüística, entregoulle o premio a Mercedes Folgueira, autora do relato gañador.

Redacción - 18:30 09/04/2008

Mírote, 25 palabras que valen unha viaxe a Venecia. Este mércores entregouse en Vieiros o premio ao relato gañador do Concurso de Microrrelatos Eróticos Ferve a Rede, organizado pola Secretaría Xeral de Política Lingüística e Vieiros. Marisol López felicitou á gañadora, Mercedes Folgueira, e fíxolle entrega do galardón e do premio: unha viaxe a Venecia para dúas persoas.

Mercedes Folgueira, aínda que vive en Castro de Rei, naceu en Avilés, de pai galego e nai burgalesa, unha mostra de que non hai dificultades para chegar á lingua galega, mesmo tendo nacido e estudado fóra. Escribir un microrrelato é difícil, polas esixencias do espazo (550 caracteres neste caso), pero moito máis se se trata dun relato erótico, un xénero no que cómpre moverse con sutileza, para achegar carga erótica, impactar e emocionar, mais sen caer no soez, ou no excesivamente explícito ou, polo outro extremo, no cursi, no requintado.

Mercedes di que cando comezou a ler os outros relatos candidatos, pensou que o seu quedara moi curto en canto ao seu contido erótico e que por ese motivo non tiña demasiadas posibilidades de gañar. E que mesmo algún familiar, seguramente un chisco asustado polo 'apelido' do concurso, ao ler o texto espetou un "pois tampouco é para tanto". A autora afirma que para ela o tema principal do relato é "o cambio de rol da parella na cama, pois non sempre é a muller a que lle pregunta ao home se a quere". Así mesmo, confesou que o galardón dálle "forzas" para continuar escribindoe que comezará a refacer outros relatos que escribira para poder presentalos a otros concursos.

A Secretaria Xeral de Política Lingüística, Marisol López salientou a "importancia" deste tipo de iniciativas para a normalización da lingua en "todos os ámbitos", neste caso o "máis íntimo" e persoal. Tamén destacou que o concurso se dirixira, e contara coa participación (sobre todo) de xente nova, grupos de idade nas que é preciso facer máis esforzos para normalizar o uso da lingua.

No concurso participaron 290 relatos, unha cifra moi alta, que deixou patente a creatividade dos lectores de Vieiros. Entre todos os participantes sorteouse un segundo premio: unha estadía dunha fin de semana nunha casa rural próxima á parroquia do Sexo, en Agolada. A gañadora foi Susanamoo, que preferiu que o seu nome real ficase no anonimato.

O relato gañador: Mírote

Nun vaivén de suor núa, alzo a mirada para te ollar mellor.
Quéresme? Disme docemente.

Eu arqueo as cellas...
...nunca souben falar coa boca chea.



4.18/5 (11 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: