Vieiros

Vieiros de meu Perfil


Galego.org

Xestionado por Vieiros
RSS de Galego.org
GalegoLab

Tés ideas para a lingua?

Pois actívate e comparte con esta nova ferramenta en liña para sumar esforzos en prol do galego.

Redacción - 19:00 09/06/2010
Tags: GalegoLab

Abrolla na rede unha ferramenta permanente de difusión do idioma baixo o nome GalegoLab. Unha plataforma de internet que, a xeito de rede social buscará pór en contacto persoas e coordinar achegas de medios de todo tipo para levar a bo fin accións positivas a prol da lingua.

GalegoLab nace á vez como asociación cultural co obxectivo declarado de "sumar esforzos e vontades, coñecementos e contactos, habilidades e afeccións en defensa do idioma galego, especialmente centradas nas culturas emerxentes e nos sectores máis novos da sociedade". "Entre os seus socios e socias hainos de distintos equipos de fútbol, distintas ideoloxías, distintas idades e distintos gustos gastronómicos, pero todos coinciden no seu interese por promover a lingua galega", expoñen na presentación.

As primeiras suxestións, achegadas pola propia asociación son: "Ida e volta", un encontro musical "coruñento-vigorento", sería un concerto en dúas xornadas (unha en Vigo e outra na Coruña), que busca xuntar grupos das dúas principais cidades galegas, con repertorio galego, "superando as ficticias rivalidades e reivindicando o uso do galego no ámbito urbano entre a xente nova"; 24 horas galego fullscreen: concurso audiovisual de vídeos de 5 minutos como máximo no que se resuman as 24 horas de conduta lingüística dun falante de Galiza; Galegogym: edición dixital de música en galego coa que facer fitness, para distribuír por ximnasios de todo o país; e Flashgalego, que propón a convocatoria de flashmobs en cidades de Galiza e lugares de veraneo (a experiencia piloto sería na Coruña e baixo o ritmo da canción, de Juan Pardo, "Falade meniñas, falade galego".


4.62/5 (21 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: