Vieiros

A ONU centra a celebración esta quinta feira do Día dos Dereitos Humanos na necesidade de erradicar a discriminación que sofren en todo o mundo grupos "vulnerábeis", como as minorías raciais, os inmigrantes, ou as persoas discapacitadas.

"Ningún país está libre da discriminación, vémola en todas partes e de todos os xeitos: nova e vella, encuberta ou descarada, pública e privada", asegura o secretario xeral da ONU, Ban Ki-Moon, nunha mensaxe divulgada con motivo desta xornada.

O máximo responsábel do organismo mundial resaltou que a discriminación se manifesta no racismo institucionalizado, nos conflitos étnicos, nos episodios de intolerancia, ou en versións oficiais da historia que ignoran a identidade doutros.

• Mensaxe oficial do secretario xeral da ONU (varias linguas)
  

Por outra banda, a Comisión Española de Axuda ao Refuxiado (CEAR) denunciou esta cuarta feira que o 40% das persoas que pasou polas instalacións habilitadas para acoller estranxeiros sen documentación denunciou sufrir malos tratos.

• Informe sobre os 'centros de internamento' de emigrantes (.pdf /en castelán)