Vieiros

O presidente chinés, Hu Jintao, abandonou este mércores repentinamente Italia, até onde viaxara para participar na cimeira do G8, e puxo rumbo a China debido ás fortes protestas que continúan desenvolvéndose na rexión autónoma de Xinjiang, segundo confirmou un diplomático da Embaixada chinesa en Roma.

Hu Jintao chegou á capital italiana o pasado domingo, con motivo dunha visita de Estado, convidado polo seu homólogo Giorgio Napolitano, e durante a súa estancia no país europeo reuniuse tamén co primeiro ministro Silvio Berlusconi, así como con líderes parlamentarios, co obxectivo de "impulsar as relacións bilaterais", segundo informou a axencia de noticias Xinhua.

Porén, a continuidade das protestas en Urumqui -capital de Xinjinag-, onde morreron 156 persoas nos enfrontamentos entre cidadáns da etnia han e da etnia uigur, obrigou a Hu Jintao a cancelar a súa participación na xuntanza das principais economías do mundo, para regresar a China. Así mesmo cancelou tamén a súa viaxe a Portugal, previsto para cando terminase a cimeira. No entanto, unha delegación chinesa permanecerá en Italia para participar no encontro que se está a desenvolver en L' Aquila, e onde está previsto que o G8 lance un fondo de entre 10 mil e 15 mil millóns de dólares para combater o fame no mundo, segundo declarou onte o primeiro ministro de Italia, Silvio Berlusconi, nunha conferencia de prensa.

Mentres, medra a tensión en Xinjiang
Con motivo dos disturbios do domingo en Xinjiang, (noroeste de China), as autoridades da rexión impuxeron o toque de queda na capital, Urumqi, entre as 21h00, hora local, do martes e as 8h00 deste mércores. Neste tempo, desenvolverán "controles de tráfico", co fin de evitar novos enfrontamentos entre os cidadáns, segundo as noticias oficiais chinesas.

Ao parecer, este martes continuaron os enfrontamentos entre etnias, e varios cidadáns Han -maioría nesta provincia-, saíron á rúa armados con barras de ferro (vídeo) coa intención de vingar os feitos do domingo, dado que algúns medios apuntaron que a maioría dos mortos pertencían a este grupo étnico. A policía, desbordada, lanzou gases lacrimóxenos para dispersar os manifestantes, segundo a axencia Reuters. De momento, no hai constancia de que haxa novos feridos ou algún falecido. Antes de que os han saísen á rúa, centos de uigures tíñanse reunido por protestar contra a represión policial vivida o domingo, un do enfrontamentos máis violentos dende a matanza de Tiananmen. De feito, alén dos 156 mortos, houbo máis dun milleiro de feridos e perto de milleiro e medio de persoas foron detidas.

Mentres, o goberno chinés insiste en que detrás de toda a revolta atópanse os independentistas do Congreso Mundial Uigur.

Máis información:

• BBC: Hu leaves G8 amid Chinese rioting
• Xinhua (axencia de noticias oficial chinesa): Hu Jintao parte a casa de manera anticipada por situación en Xinjiang
• Congreso Mundial Uigur (uigures no estranxeiro): World Uyghur Congress' Statement on July 5th Urumqi Incident