Vieiros

Vieiros de meu Perfil


Edición xeral

RSS de Edición xeral
MOVEMENTOS NA BANCA

A fusión, unha saída para as caixas en crise

Seguen os movementos a nivel estatal. Mentres, as caixas galegas discrepan sobre esta posibilidade e ábrese a expectación sobre os pasos do próximo Goberno.

Redacción - 12:00 11/03/2009

Primeiro foi Caja Castilla la Mancha e a andaluza Unicaja, quen a pasada semana chegaron a un principio de acordo de fusión que dará lugar á quinta caixa de aforros do Estado Español, cuns activos de 60 mil millóns de euros. A integración entre as diferentes entidades nestes tempos de crise é unha solución e unha oportunidade de negocio que non rexeitan os directivos ante unha situación financeira cada vez máis difícil.

Agora é a quenda de Caja Duero, quen autorizou aos seus responsábeis a estudar a súa posíbel participación nun eventual proceso de integración ou consolidación con outras caixas de Castela e León. Neste caso, a posibilidade dunha unión non abandonaría os límites da comunidade autónoma, un extremo que si se cumpriría no caso de Unicaja. En concreto, o consello acordou por unanimidade explorar a disposición doutras entidades para participar "en procesos de integración ou consolidación tendentes ao fortalecemento da solvencia, eficiencia e competitividade do sistema financeiro rexional".

Caso galego
Ante as dificultades que está a atravesar o sector, e que afectan especialmente ás caixas de aforro de menor tamaño, os procesos de integración son unha alternativa a estudar. Con todo, o ruxerruxe dunha posíbel fusión das galegas xa foi contestado nos pasados meses polos presidentes de Caixanova e Caixagalicia. Dunha banda, o responsábel da primeira, Xulio Fernández Gayoso, sostiña en febreiro que "a Galiza convénlle que haxa dúas caixas e que compitan por facelo cada vez mellor", ao tempo que aseguraba que esa fusión só se explicaría nunha situación extrema. Pola súa parte, o vicepresidente de Caixa Galicia, Salvador Fernández Moreda, sinalaba que "non sería malo formular unha integración no medio ou longo prazo".

Ao respecto tamén se pronunciou o conselleiro de Economía en funcións, Xosé Ramón Fernández Antonio, quen nunha entrevista de Vieiros aseguraba: "s procesos de fusión deben partir das entidades e neste momento temos un sistema de caixas eficiente e competitivo e nese sentido a fusión non está na mesa, senón o impulso da actividade económica, a modernización do noso país e a colaboración destas entidades plenamente comprometidas co noso desenvolvemento en profundizar nas liñas estratéxicas".

Con todo, se a situación financeira o suxire, o futuro goberno galego facilitaría esta unión. Así o aseguraba tamén a Vieiros en campaña electoral o responsábel económico do Partido Popular, Pedro Arias, quen sobre unha hipotética fusión dicía: "se analizados os datos vemos que hai un contexto claro de dificultade, é inevitábel que a proposta lóxica sexa a fusión e que se faga todo o posíbel para facilitala. Pero insisto, o primeiro é estudar a situación real".


Ligazóns

3.67/5 (3 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Caixa Galicia non descarta unha fusión a longo prazo. Na foto, Xosé Luis Méndez, presidente da entidade.
Caixa Galicia non descarta unha fusión a longo prazo. Na foto, Xosé Luis Méndez, presidente da entidade.
Caixanova asegura que esa opción só se tomaría nunha situación extrema
Caixanova asegura que esa opción só se tomaría nunha situación extrema