Vieiros

Foi o 23 de xullo pasado cando lles contamos da acción organizada por un grupo de veciños de Mugardos en protesta pola planta de gas erguida a pé das súas casas. Había apenas uns días que o Consello da Xunta lle dera a aprobación ao plan de emerxencia da regasificadora. Paradoxalmente, a liña de seguridade estabelecida no propio plan, cun límite de 400 metros, inclúe vivendas particulares a menos distancia.

Con ese e outros exemplos en denuncia do feixe de irregularidades sufridas a conta do proxecto, os veciños acudían á Casa do Concello e pechábanse aló nun intento de estender as súas reclamacións sobre a situación. No caixón van quedando toda unha galería de requirimentos sen atender, entre eles a petición ao director da Área de Industria e Enerxía da Coruña, Francisco Barroso, da denegación de autorización final de explotación a Reganosa, beizón que aínda non lle foi outorgada malia estar xa en funcionamento. Esta semana fanse tres meses do inicio da protesta.


O último comunicado do Comité Cidadán de Emerxencia para a Ría de Ferrol chama a atención sobre os depósitos de Ferrazo en Arousa. A plataforma ferrolá lembra que estas instalacións onde desde 2000 hai uns depósitos de hidrocarburos líquidos con 80 mil toneladas almacenadas foron obxecto de rexeitamento e protestas populares, semellantes ás realizadas contra Reganosa. Ao fío, quéixanse de que a vontade actual do Goberno de rematar cos depósitos de Ferrazo mentres non se atenden as demandas contra Reganosa amosaría "dúas varas de medir".