Vieiros

A Coordinadora de Crentes Galegos -que representa máis de vinte asociacións do país, así como un importante número de persoas que participan a título individual- fixo publico un manifesto crítico en relación cos chamados Mártires da Guerra Civil, 498 persoas asasinadas no bando republicano por motivos relixiosos que van ser beatificadas pola Igrexa Católica o vindeiro 28 de outubro.

"Dende a máis profunda admiración polas vidas e sobre todo polas circunstancias das súas mortes, cremos que, dado que a Igrexa non pediu perdón polo acontecido, esta beatificación é inoportuna", afirman no comunicado, no que tamén critican que a xerarquía católica sexa "incapaz de superar posicións de hai setenta anos" e que se "preste á politización".

"Hoxe xa non se trata de buscar culpábeis, mais tampouco se trata dun ambiguo relativismo histórico. Trátase de que todas as partes recoñezan a súa parte de culpa, e en primeiro lugar nós, os cristiáns, recoñecer e pedir perdón pola posición belixerante que a maior parte da Xerarquía eclesiástica tivo", din.

Poden consultar o manifesto completo no documento adxunto.