Vieiros

Desde o 10 de abril e até o final de curso desenvolverase nos dos campus da Universidade de Santiago de Compostela un programa pioneiro de préstamo de bicicletas aos membros da comunidade universitaria. A iniciativa ten como obxectivo facer pública a viabilidade da bicicleta como ferramenta de transporte nuns espazos cada vez máis saturados de tráfico motorizado.

O programa piloto que se desenvolverá até o 29 de xuño servirá para estudar a posibilidade de establecer un servizo permanente de cesión de bicicletas e avaliar as posíbeis eivas con vistas a elaborar un programa máis amplo. Deste xeito tentarase valorar o interese do colectivo universitario neste medio de transporte así como analizar as particularidades do seu uso no entorno dos campus de Santiago e Lugo. As persoas que participen no proxecto recibirán ademais clases de mecánica básica e de condución urbana.

Desde Verdegaia sinálase que “o inicio da solución dos problemas inherentes ao transporte e a mobilidade pasa por ser conscientes de que movernos incide no ambiente, incide no noso entorno social e incide noutros países e colectivos dos que parten as materias primas para manter o actual sistema de transporte”. É por iso polo que desde a asociación ecoloxista asegúrase que é necesario “escoller o medio máis axeitado en cada momento tendo en conta todos os factores e favorecendo o menor impacto”.