Vieiros

Inténtase, segundo o deputado Gustavo Hernández, mergullar aos venezuelanos nunha campaña a favor ou en contra dun ou doutro bando. Preténdese, afirmou, crear unha polarización electoral artificial, cando todos os estudos de opinión indican que política e socialmente, Venezuela non está polarizada. “Tanto o PSUV como a MUD, fan esforzos desesperados para que Venezuela novamente se divida en dous. Todo este circo das eleccións internas non ten outro propósito que o de intentar repolarizar o país. Nós no partido Patria Para Todos (PPT) cremos que é indispensábel que os cidadáns voten reflexivamente; cada un dos electores debe pensar moi ben o seu voto e, polo ben do país, deben escoller os mellores candidatos. A polarización é unha trampa que lle fixo un enorme prexuizo a Venezuela, que induce aos venezuelanos a votar automaticamente por un sector ou outro, sen facer unha valoración axeitada dos representantes populares”.

O deputado Gustavo Hernández sinalou que os actuais deputados están obrigados a render contas da súa xestión parlamentar ante os cidadáns. Informou que a deputada polo estado Carabobo á Asemblea Nacional, Laura Valls, coma todos os deputados do seu partido, renderon contas da súa xestión nun acto público que se realizou o 8 de maio na cidade de Valencia.

Os chamados “socialistas azuis” do partido Patria Para Todos presentarán candidatos que expresen o mellor da sociedade venezuelana, no campo político, académico, intelectual, científico e da loita social, finalizou o deputado.