Vieiros

Vieiros de meu Perfil


Edición xeral

RSS de Edición xeral
DESMANTELAMENTO

O Consorcio comunícalles o despedimento aos traballadores das oficinas de Igualdade e Benestar

O Goberno rescinde 61 contratos de “obra e servizo” a pesar de que asegura que non suprimirá os programas que estaban a levar a cabo.

Redacción - 14:00 16/12/2009

O Consorcio Galego de Servizos de Igualdade e Benestar comezou a enviarlle esta semana as cartas de despedimento a 61 traballadores das oficinas comarcais de Igualdade e Benestar (I+B). No documento, o organismo público, dependente da Consellaría de Familia e Benestar, sinálalles que a final deste mesmo mes rescindirán os seus contratos de “obra e servizo”. O Goberno entende que o 31 de decembro remataba a relación laboral. Porén, os representantes dos traballadores dan por feito que estes despedimentos son improcedentes xa que a propia Xunta confirmou que os programas que están a desenvolver as oficinas van seguir durante o vindeiro ano, polo que se entende que a obra e servizo prosegue.

Rematan así dous meses de pulso entre traballadores e Goberno que comezou cunhas polémicas declaracións da secretaria xeral de Familia e Benestar. En outubro, quixo achanzar a decisión política que agora se toma asegurando que os traballadores contratados na etapa do bipartito non pasaran ningún proceso de selección. Os afectados demostraron a existencia dos concursos regulamentarios e exixiron a rectificación inmediata da alto cargo. O enfrontamento entrou na vía xudicial. Un grupo de técnicas das oficinas I+B presentaron unha querela contra López Abella que está a tramitar un xulgado de Compostela.

Dende a oposición política acusaron ao executivo de intentar desacreditar aos empregados públicos para poder xustificar publicamente a abolición de servizos públicos. A pesar das protestas, das recollidas de sinaturas e do apoio que moitos concellos e colectivos, o executivo negouse a reconsiderar a súa decisión.

Nova folga no Consorcio

Mentres, este mesmo xoves volverá haber mobilizacións no Consorcio. Os 1.200 traballadores están chamados pola CIG a unha xornada de folga na que se reivindica a aplicación do convenio, a convocatoria de oposicións pendentes e a paralización da supresión de servizos.


5/5 (8 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: