Vieiros

"Que se corrixan os pasos atrás". Iso foi o que lle pediu o presidente da Mesa pola Normalización Lingüística ao director xeral da Compañía da Radio Televisión de Galiza (CRTVG) na xuntanza mantida este venres. Carlos Callón pediu que "a radio e a televisión públicas sexan críbeis, plurais e que promovan a lingua e a cultura de noso". Ao tempo fixo un chamado á sociedade "para defender os medios públicos con uñas e dentes do desprestixio a que a leva o goberno de Núñez Feijoo".

Os teletubbies, en galego
O presidente da Mesa trasladoulle a Alfonso Sánchez Izquierdo "as numerosas queixas de nais e pais por se deixaren de emitir os Teletubbies en galego". Lamentou que a serie se emita agora en inglés con subtítulos, malia que o público destinatario, menores de tres anos, aínda non saiba ler.

Finalmente pediulle ao director xeral da compañía que respecte a pluralidade nos espazos informativos. Nesa liña, subliñou que a mesa "ve silenciados como nunca os movementos cidadáns en defensa da lingua de Galiza, a pesar do seu nivel de actividade e representatividade". Ademais pediulle que "dea cumprimento ás diferentes medidas aprobadas no Plan Xeral de Normalización da lingua galega".