Vieiros

Vieiros de meu Perfil


Eleccións Galiza 2009

RSS de Eleccións Galiza 2009
Reforma da Lei Electoral: Sufraxio exterior

'Se resides, decides'

Profesores, artistas e históricos intelectuais como Pousa Antelo amparan unha plataforma para exixir que o voto sexa un "dereito de residencia, non de sangue".

Redacción - 11:30 16/02/2009
Avelino Pousa Antelo é un dos asinantes da iniciativa

Avelino Pousa Antelo é un dos asinantes da iniciativa

O histórico intelectual Avelino Pousa Antelo, a académica da lingua Margarita Ledo Andión ou o economista Vítor Moro son algúns dos coñecidos profesionais do noso país que amparan publicamente a plataforma 'Se resides, decides', constituída a semana pasada e que defende e traballa para que o voto sexa un "dereito de residencia, non de sangue".

Segundo informan, "a iniciativa aspira a dar resposta ao amplo sentir cidadán crítico coas manifestas eivas do actual sistema electoral, que recoñece dereito pleno a colectivos que residen no exterior e cuxo único vínculo co país consiste precisamente no exercicio do dereito a voto ao tempo que mingua, ou directamente nega, dereitos a colectivos que residen de forma permanente no país (mariñeiros, penados, inmigrantes)".

Xa que logo, procurará "a reforma en profundidade da actual Lei Orgánica de Réxime Electoral Xeral (LOREG, 5/1985) e que os dereitos que se recoñezan ás persoas de orixe galega que residen de maneira permanente no estranxeiro se regulamenten de acordo con esa situación. "Trátase como é sabido dun problema que a nosa sociedade arrastra dende hai moito tempo e que nos últimos anos adquiriu proporcións que dificilmente pode admitir unha sociedade que se reclama democrática", afirman.

Campaña en dúas fases

Para conseguir o obxectivo que perseguen, a plataforma prevé desenvolver unha campaña en dúas fases: A primeira, que culminará o 1 de marzo, día das eleccións, diríxese ás formacións que presentan candidatura "para os instar a adquiriren o compromiso público e firme de iniciar, inmediatamente a seguir a constitución do próximo Parlamento, todas as xestións que estean ao seu alcance (tanto no eido autonómico como no estatal) para que a LOREG de 1985 sexa inmediatamente derrogada".

Na segunda, 'Se resides, decides' traballará para que a nova lei contemple as súas reivindicacións, que considera comparte a "esmagadora maioría da sociedade galega". Con esta perspectiva, actuará "ante os poderes públicos" e realizará unha "ampla campaña de sensibilización social". Dende a plataforma informan que en pouco tempo darán a coñecer o enderezo da sua web, "que estará aberta a todas aquelas persoas e colectivos que queiran prestar o seu apoio á iniciativa".


Asinantes:


Avelino Pousa Antelo
(presidente da Fundación Castelao)

Víctor Moro
(economista)

Fernando Martínez Randulfe (avogado)

Quico Cadaval
(director de teatro)

Afonso Eiré
(escritor e xornalista)

Miguel Barros
(presidente de Promocións Culturais Galegas)

José António Redondo López
(profesor)

Luís Caramés
(profesor)

Ugia Pedreira
(música)

Uxia Senlle
(cantante e compositora)

Xurxo Lobato
(fotógrafo)

Eias Torres Feijó
(vicerreitor da USC)

Margarita Ledo Andión
(profesora)

Antón Reixa
(director e produtor de cinema)

Xesus Seixo
(secretario Xeral da CIG)

Luís Gonçalez Blasco
(professor)

José Alberto Garcia Suarez
(professor)

Rosa Verdugo Matês
(professora)

Elvira Souto
(professora)

Ramom L. Suevos
(professor)


4,47/5 (30 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: