Vieiros

"O primeiro que lle deberiamos esixir ao goberno que saia das urnas é que se esforce en darlle continuidade a unha das claves da última lexislatura en Galiza: a aposta polo diálogo social. É fundamental continuar nesa liña, e afondar en todas as posibilidades.

Nun contexto como o actual, coa conxuntura económica que vivimos, debe ser prioritario manter un esforzo especial en protexer a parte máis débil da sociedade neste escenario. O reforzo das garantías en favor dun emprego digno e as políticas a prol dunha cobertura social ambiciosa serán fundamentais.

Tamén é necesario acelerar o cambio respecto do sistema herdado, un conxunto de inercias caducas, que fan preciso ocuparse de poñer ao día as políticas para afondar no cambio de sistema produtivo que o noso país necesita.

Eu penso que se iniciou un cambio no bo camiño e que será posíbel esa viraxe de modelo produtivo. Unha viraxe que se basea nun maior respecto polos traballadores, a aposta por un país con cidadáns mellor formados e polo estímulo da competitividade da nosa economía"