Vieiros

Vieiros de meu Perfil


Edición xeral

RSS de Edición xeral
SECTOR DA LOUSA

"Estamos no límite das nosas posibilidades"

Un milleiro de traballadores da extracción da lousa maniféstanse contra o desmantelamento do sector no concello de Quiroga.

Redacción - 09:15 13/09/2008

A lousa que outrora era o sector máis puxante nas montañas de Pacios da Serra (Quiroga), que durante corenta anos de actividade mineira empregou a 650 traballadores da zona, e que arramplou con zonas de especial interese paisaxístico, entrou nun momento de crise. As tres empresas que extraen os seus beneficios da procura desta rocha metamórfica (Ferlosa, Pebosa e Cupiga) están a pasar por momentos difíciles, unhas consecuencias que pagan directamente os traballadores.

Na actualidade, ningunha das tres empresas mantén a súa actividade normal. A pasada semana Ferlosa asinou un Expediente de Regulación de Emprego (ERE), polo cal mandará os seus 90 traballadores ao paro en dúas quendas de tres meses. Mentres, en Pebosa e Cupiga, que empregan a 150 traballadores, non rexistran ningún tipo de actividade e levan dende o pasado mes de xuño sen cobrar (polo que o empresario lles adebeda catro mensualidades incluída a extra de verán). Ante esta difícil situación que está a afectar gravemente ás familias da comarca, os tres sindicatos maioritarios no sector (CIG, UXT e CCOO) veñen de convocar unha concentración co obxectivo de "denunciar o seu desmantelamento e a grave situación pola que están a pasar os traballadores, así como concienciar ao entorno sobre a realidade dos empregados da lousa".

Crise que vén de atrás
O difícil momento que sofre o mercado da construción abocou ao sector da lousa a esta situación, pero esta non é a súa única causa. A Asociación Galega de Louseiras (AGP), coa que hoxe foi imposíbel falar, xa apuntara en xullo outras como a subida do gasóleo e, sobre todo, o aumento dos custes de produción, entre eles a maquinaria, que non teñen a súa repercusión no prezo da lousa. Non obstante, dende os sindicatos non eximen de responsabilidades aos empresarios. O secretario xeral de UXT – Lemos, Mario Docasar, acusa directamente ao berciano Plácido Carreira (propietario de Pebosa e Cupiga) de eludir dar explicacións: "está desaparecido dende hai dous meses e aquí ninguén sabe nada del". Igualmente, o secretario local de CIG Lemos, Xosé Manuel López, recorda que cando comprou a empresa a finais de 2006 xa estaba en concurso de acredores: "veu para gañar cartos e ao ver que a cousa non pintaba ben esfumouse".

Afección ambiental
A desaparición deste empresario contrasta cos 300 expedientes de empresas mineiras que piden que se legalice a súa situación que se amorean nas oficinas de Urbanismo da Consellería de Política Territorial. É, en suma, unha mostra máis de que este interese empresarial se reduce ao económico, pexa o ambiental e, aínda máis, deixa sen futuro á comarca. Os diferentes colectivos ecoloxistas, como Adega ou SOS Courel, veñen de exixir en reiteradas ocasións a necesaria protección dos valores naturais, así como a lexítima demanda veciñal de oportunidades laborais no lugar.

Así tamén os sindicatos son conscientes de que o futuro da comarca pasa pola recolocación de moitos dos traballadores. Ademais da manifestación, están a traballar na creación dun observatorio que estude as posibilidades que se abren para os traballadores que previsibelmente acabarán no paro e como axudar aos que, despois de tres meses de impagos, non poden facer fronte ás súas débedas. Esta iniciativa xa conta co apoio de todos os concellos afectados (Quiroga, Monforte e Valdeorras) e prevén reunirse proximamente coa Consellería de Industria, a de Traballo e de Medio Rural. Con todo, a CIG apunta á reconversión do sector e á busca da súa diversificación: entre as posibilidades que se barallan está a da horticultura e fruticultura, aproveitando o microclima da zona, ou a mellora do sector forestal, entre outras. Agardan unha resposta por parte das administracións para buscaren unha saída ao problema, xa que reiteran que están xa "ao límite das súas posibilidades".


Ligazóns

3/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: