Vieiros

O principio de acordo inclúe unha indemnización para os afectados polo axuste de 36 días por cada ano traballado, cun tope máximo de 20 mensualidades, superior ás de 25 e 28 días por anos que a inmobiliaria ofreceu en anteriores reunións. Da indemnización total, o Fondo de Garantía Salarial (Fogasa) encargarase de aboar 20 días por ano e a empresa os outros 16, segundo apuntan desde a UXT.

A inmobiliaria comprométese agora a garantir a estabilidade do equipo que se mantén, que despois do despedimento desas 234 persoas, o 26% do cadro, quedará en algo máis de 600 persoas. O acordo aínda deberá ser ratificado en asemblea polos traballadores e remitido ao Xulgado do Mercantil da Coruña, onde se tramita o concurso da sociedade. O xuíz titular deste xulgado é quen ten a competencia para pronunciarse sobre o axuste de equipo da inmobiliaria, dado o proceso concursal en que está inmersa.

Ao respecto, o Ministerio de Traballo anunciou que se inhibirá no proceso deste Expediente de Regulación de Emprego, argumentando que a Lei Concursal estabelece "competencia exclusiva" para o xuíz dun proceso concursal dende o mesmo momento en que unha empresa o solicita.