Vieiros

"O día da Patria Galega é unha celebración que vai alén do nacionalismo, chegando a amplas capas do pobo galego", comentou Alberte Ansede, secretario de Organización do BNG, durante a conferencia de prensa coa que esta semana se presentaron as actividades do Bloque para a xornada do Día da Patria. "O noso futuro pasa por desenvolver o que somos, por crer no noso país e nas nosas potencialidades", dixo Ansede, quen sinalou entre os retos para o futuro próximo: igualdade xurídica do galego co castelán, Estatuto de Nación ou a comisión de seguimento das infraestruturas.

A manifestación irá encabezada pola executiva nacional do BNG, seguida por unha pancarta na que irán os cargos institucionais; logo irán as delegacións internacionais e nacionais convidadas e en cuarto lugar a pancarta de Galiza Nova. Espérase, como é habitual, a asistencia de numerosos convidados doutras nacións do Estado español, de Portugal, da Unión Europea e do resto do mundo. Entre outros, estarán representantes dos partidos firmantes de Galeuscat: Convergència Democrática de Catalunya, Unió Democrática de Catalunya e o Partido Nacionalista Vasco. Tamén, envían representación Esquerra Republicana de Catalunya e Eusko Alkartasuna. Nafarroa Bai enviará dúas persoas, entre elas Uxúe Barkos, portavoz en Madrid. Ademais, acude o Bloc Nacionalista Valenciá e dúas organización das Illes Balears, o Partit Socialista de Mallorca e Unió Mallorquina.