Vieiros

"Hai unhas 4.000 millóns destas bolsas por aí, que chegan ao campo, terminan por afectar á nosa natureza, e que vemos nas nosas praias cando imos de vacacións", dixo o novo ministro de Medio Ambiente, o laborista (socialdemócrata) Peter Garrett, esta quinta feira.

Australia segue deste xeito os pasos de China ao anunciar os seus plans de acabar co uso de bolsas de plástico nos supermercados.

Garrett, que quere que se aplique gradualmente desde finais de 2008, dixo: "Creo que a maioría dos australianos queren acabar con elas. Cremos que é absolutamente fundamental que apliquemos medidas".

Ademais de China e Australia, outros países como Irlanda e Suráfrica experimentaron xa con outro tipo de medidas destinadas a eliminar o uso das bolsas de plásticos que van dende a prohibición total (China) até a imposición dun elevado imposto (Irlanda).