Vieiros

"É un recoñecemento decisivo para o coñecemento mutuo de dous pobos situados a ambos lados do río Miño que se debería reforzar e impulsar", explicou Francisco Rodríguez, deputado do BNG, logo de que a Cámara baixa aceptase coa unanimidade de todos os grupos a iniciativa en favor do patrimonio inmaterial presentada polo Bloque.

Até o verán de 2008 permanece aberto o período de presentación de candidaturas para seren incluídas na programación da Unesco en 2009. Se a proposta chegase co aval conxunto do Estado español e do portugués, a candidatura gañaría forza para pasar a peneira internacional. Rodríguez lembrou que xa en 2005, a Unesco recoñecera a calidade da proposta galego-portuguesa impulsada polo colectivo Ponte nas Ondas e recomendara introducir algunhas correccións e presentar de novo o proxecto. "Hai usos técnicos, saberes ancestrais, festas, espectáculos que se expresan nestas tradicións orais", sinalou o deputado galego, laiándose de que "cando o Consello de Patrimonio Histórico-Artístico español se reuniu en Cartaxena o pasado mes de outubro, as propostas escollidas foron outras".