Vieiros

Foi un dos trinta puntos onde os tres grupos parlamentarios conseguiron coincidir este mércores na Cámara. PPdeG, PSdeG e BNG votaron de xeito favorábel á proposición de resolución presentada polos populares onde se instaba á Xunta a facer as xestións precisas diante do goberno español para que a tarifa eléctrica que se pague en Galiza estea axustada á realidade enerxética galega. Na práctica, e segundo se sinala na proposta, iso implicaría que cando menos os usuarios do país visen afrouxadas as tarifas coa supresión do pagamento das peaxes por transporte de enerxía eléctrica.

Por outra parte, desde a Consellaría de Economía respondíanlle tamén esta cuarta feira ás ameazas de Fenosa, que por boca do seu vicepresidente, Honorato López Isla, agoiraba que lle farían pagar aos cidadáns polo estabelecemento dun canon aos encoros. Desde o Goberno insisten na "plena competencia" de Galiza para fixar ese tributo e advirten que de ningún xeito edbe implicar impacto ningún no que pagan os consumidores domésticos ou empresariais.