Vieiros

Vieiros de meu Perfil


Fwwwrando

RSS de Fwwwrando
O ESTADO PROTEXE ÁS OPERADORAS

O goberno estatal advirte que vetará as wifis públicas que estean fóra do rural

Problema para as ducias de concellos galegos que están promovendo redes sen fíos, que en todo caso terán que cobrar “tarifas de mercado”

M. Vilas - 14:35 20/09/2007
Na Estrada o wifi é gratis, pero só na fase incial / Foto: aestradadixital.org

Na Estrada o wifi é gratis, pero só na fase incial / Foto: aestradadixital.org

O goberno estatal acaba de confirmar as súas ameazas contra as redes sen fíos que están a promover moitas administracións, entre elas varias ducias de concellos galegos e a Consellería de Industria, que subvenciona até 14 wimax municipais.

E é que Madrid só permitirá que se invistan cartos públicos en levar internet "a zonas rurais ou de menor densidade de poboación". Así figura nunha ambigua resposta estatal a unha pregunta presentada polo senador nacionalista, Francico Jorquera.

Na súa interpelación, Jorquera alertaba que "as tres grandes operadores do Estado (Telefónica, Vodafone e Orange) teñen anunciado recentemente e de xeito conxunto que van emprender accións legais contra os concellos que instalen redes sen fíos de acceso gratuíto". O senador quería saber se o executivo español apoiaba esta postura.

"Tarifas conformes co mercado"
Na súa resposta, tenta nadar sen mollar a roupa. Por un lado afirma que “as administracións poden promover a oferta de servizos públicos” pero lembra que deben facelo “de xeito compatible coa normativa”. E o que marca a Lei, insiste Madrid, é o respecto a libre competencia mediante o “establecemento de tarifas conformes coas normas do mercado”.

En definitiva, semella que a Comisión do Mercado das Telecomunicacións seguirá a perseguir as wifis que prexudiquen os intereses das operadoras. Só terán o “prace” estatal as que funcionen onde ás compañías non lles compense ofrecer o servizo. E incluso as wifis rurais terán que cobrar, como vai facer A Estrada Dixital, cunha tarifa de 10 euros.

Eran realistas as promesas electorais?
O problema é que moitos alcaldes galegos prometeron na campaña electoral instalar wifis en zonas que si resultan atractivas ao capital privado. Por exemplo, en Santiago, A Coruña, Vilagarcía e Ourense.

Haberá que, polo tanto, agardar a reacción das operadoras cando as wifis comecen a funcionar. É probábel que Telefónica non proteste polas redes sen fíos en lugares moi illados, pero que si pida que a CMT vete as wifis en vilas, sobre todo se ofrecen tarifas máis baratas que as súas. Daquela será cando o Estado deberá aclarar se aposta pola iniciativa pública ou se defende os interese empresariais.


3,75/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: