Vieiros

Miles de parrulos de goma achéganse ás costas británicas despois dunha viaxe de quince anos. Os xoguetes de baño, que comparten viaxe con tartarugas e ras do mesmo material, levan viaxando polo mundo adiante dende o ano 1992. Naquela ocasión, o barco en que eran transportados dende a China até os Estados Unidos rompeu a causa dun forte temporal.

Agora, despois de varias voltas ao mundo a través do Océano Ártico, e de teren pasado pola costa leste dos Estados Unidos, Islandia, Groenlandia, Hawai e Canadá, e de teren estado conxelados durante algún tempo nas zonas glaciais, os parrulos chegarán nuns días a Cornualles e logo ás costas occidentais de Gran Bretaña e Irlanda.

Aínda que non consta que se teñan visto por Galiza, tamén existe a posibilidade de que se acheguen ás nosas, costas, pois están a viaxar arrastrados pola corrente do Golfo de México, que desemboca na costa occidental europea.

Os parrulos son doados de recoñecer porque a súa cor amarela orixinal destinxiu, e actualmente son brancos. Outra proba de autenticidade é a marca que levan inscrita: The First Years. A empresa fabricante ofrece unha recompensa de 50 libras esterlinas (74 euros) por atopar un pato, aínda que os coleccionistas poden chegar a pagar dez veces máis.

A historia deste cargamento fíxose famosa non hai moito porque os parrulos se converteron en protagonistas dun anuncio de televisión: