Vieiros

A arousá Cristina González segue firme o seu camiño cara ao campionato mundial de ultrafondo e conseguiu en Madrid unha noa vitoria, empregando 9 horas e 52 minutos para cubrir os 100 quilómetros da carreira Villa de Madrid.

Foi a única muller que conseguiu acabar a carreira, malia estar na carreira algunhas das corredoras máis sobranceiras desta disciplina a nivel estatal, como é o caso de Estefanía Climent ou Rosario Muñoz. González rematou na posición 22ª dos 33 deportistas que conseguiron rematar a carreira.

Cristina une esta vitoria ás acadadas nos 100 quilómetros de Tarrasa, nas 6 horas de Calella ou nas 24 de Barcelona. Así, presentase como unha clara candidata a obter un bo resultado no mundial de ultrafondo que se celebrará os días 2 e 3 de maio na localidade italiana de Bérgamo, e que constituirá a primeira competición internacional da arousá.