Vieiros

A corredora arousana Cristina González mantén o seu gran momento de forma e sumou unha nova vitoria coa que se consolida como a gran revelación do ultrafondo estatal neste ano 2008 que está a rematar. González levou a vitoria despois de 24 horas de dura carreira onde a fame, o esgotamento ou o frío da noite foron os principais problemas cos que se enfrontou.

Cristina aproveitou ben as 24 horas e completou unha distancia de 177 quilómetros e 700 metros, rematando na sétima posición xeral sobre os 24 participantes que chegaron ao mediodía do domingo. González gañou con claridade a categoría feminina avantaxando en máis de 40 quilómetros á segunda clasificada, a italiana Giovanna Zappitelli; e en máis de 70 á terceira, María Nuria Ruíz Solé. A primeira posición xeral ocupouna Ángel Marcos de la Mata, despois de correr máis de 220 quilómetros.

Con este resultado, Cristina González rebaixa o anterior rexistro en máis de 14 quilómetros e consolídase como candidata a realizar un bo papel no mundial do ano próximo.

Parella chea de vitalidade
Por outra banda, o compañeiro sentimental de Cristina levou a vitoria nunha carreira de seis horas disputada durante a noite. Alberto Meléndez percorreu 72 quilómetros e 800 metros, rematando cunha vantaxe superior aos cinco quilómetros sobre o seu inmediato perseguidor, Jordi Marí.