Vieiros

Á FEG chámalle a atención a coincidencia entre o anuncio de moción feito polo PP e a intención da Xunta de Galicia de reactivar a autorización de parques eólicos nesta área de grande interese natural. A FEG recorda que o novo decreto eólico quere practicamente deixar en mans dos concellos, por medio das licenzas municipais, a autorización dos parques eólicos, polo que no caso da Veiga sería fundamental chegar a facerse coa alcaldía.

A posibilidade da autorización de parques eólicos nesta área trátase dunha moi mala nova para o patrimonio natural de Galiza e de Pena Trevinca, que estaba pendente até hai moi poucos meses de ser declarada Parque Natural. De feito a inicios deste ano xa se daba por feito que esta zona sería Parque Natural antes do remate do 2009.

A posibilidade de construción dun parque eólico nunha serra montañosa como Trevinca supón unha ameaza crítica para a conservación dos valores naturais e paisaxísticos do “teito de Galicia”. Dende a FEG preguntámonos que está a facer nestes momentos a Xunta de Galiza para protexer áreas naturais de tanta importancia coma é o caso desta serra.

Dende a FEG reclamamos ao presidente Feixoo que revele as intencións do seu goberno para este espazo natural, e se dentro das súas prioridades está a declaración coma Parque Natural ou se pola contra pensa autorizar a súa destrución coa construción dun complexo industrial eólico, instalación totalmente incompatible coas medidas de conservación e a filosofía que supón o recoñecemento do que debe ser un Parque Natural.