Vieiros

A Secretaría Xeral de Política Lingüística renovou a súa web, coincidindo co comezo do curso. As principais novidades atópanse na sección dedicada aos equipos de normalización e dinamización lingüística. Ademais dun redeseño, ofértase un espazo para que os equipos compartan experiencias e iniciativas dos seus centros.

Segundo informou a Xunta, a web dos ENDL ofrece agora información como recomendacións para a elaboración do proxecto de dinamización lingüística dos centros até propostas de traballo para o comezo do curso. Outros contidos fornecidos son blogues de interese, iniciativas para as familias, recomendacións bibliográficas ou consellos para o ensino do alumnado inmigrante.

A renovación tamén lle afecta ao boletín sobre novas do galego, que se distribúe a través do correo electrónico. Até o momento, xa conta con máis de mil subscritores, que se deron de alta a través da web de Política Lingüística.