Vieiros

11 millóns de toneladas de dióxido de carbono ao ano. Esta é a cantidade que emiten o conxunto de edificios públicos de Gran Bretaña, segundo un estudo que encargou o propio goberno e que o xornal The Guardian fixo público nos pasados días. A auditoría fíxose sobre o conxunto de 18 mil edificios públicos do país e os datos non puideron ser máis desfavorábeis, tanto que a pegada de carbono da illa británica é superior á de moitos países africanos, como por exemplo Quenia.

O Parlamento e o Banco de Iglaterra consumen electricidade e gas suficiente como para emitir 21.356 toneladas de CO2 por ano, é dicir, o equivalente a máis de 14 mil persoas viaxando en avión entre Londres e Nova Iorque. Pero este non é o dato máis vergoñento: a oficina central do departamento de enerxía e cambio climático (situada en Whitehall Place) é un dos edificios máis contaminantes, con 1.336 toneladas de dióxido de carbono anuais.

Medidas urxentes
O informe fala de descoñecemento por parte dos responsábeis, de equipamento ineficiente e de mala xestión enerxética como posíbeis causas deste malgasto. Con todo, as promesas do goberno son as de reducir as emisións por parte das oficinas estatais nun 30% nos vindeiros 12 anos, uns propósitos que exixen xa tanto os partidos da oposición como diferentes grupos ecoloxistas. Ambos recórdanlle ao executivo que as facturas en concepto de enerxía do sector público suman na actualidade preto de catro mil millóns de libras anuais e piden investimento para un programa de renovación urxente do actual modelo.