Vieiros

Un excepcional Fernandinho levou o Ázkar á vitoria por 5-2 ante o Marfil Santa Coloma, nun partido disputado este sábado no pavillón municipal de Lugo. O aleiro brasileiro rachou o partido cun gol no derradeiro minuto do primeiro tempo e outro ao inicio do segundo. Esta derrota deixa ao Santa Coloma como último clasificado da liga.

Polo seu lado, o Lobelle baixou até a cuarta posición na liga despois de perder por 7-4 fronte o Peinasa Cartagena. O partido comezou cun ritmo vertixinoso e mantívose igualado até mediada a primeira parte. Nese momento apareceron Javi Matía e Esquerdinha para distanciar ao Cartagena no marcador.

O Ázkar sobe así até a segunda posición na clasificación da máxima división estatal, a só un punto do Pozo de Murcia Turística. O Lobelle baixa até o cuarto lugar, a tres puntos dos lucenses e outros tres do líder.

Na seguinte xornada o Ázkar terá un difícil partido na casa do Pozo de Murcia Turística. A primeira posición estará en xogo no pazo dos deportes de Murcia, o vindeiro sábado. O Lobelle tamén terá un partido complicado, xa que recibirá no multiusos do Sar a todo un histórico como o Playas de Castellón.