Vieiros

Segundo informaron a Europa Press fontes policiais, na mañá deste luns produciuse a detención dun terceiro mozo presuntamente participante na protesta diante da deputada vasca do PP María San Gil. Non se coñece aínda a identidade deste terceiro detido, aínda que si se avanzou que pasará este mesmo luns a disposición do xulgado de instrución número 1 de Santiago de Compostela.

Segundo as fontes policiais consultadas, a investigación permanece aberta e non se descartan novas detencións nas próximas horas. Segundo as mesmas fontes, as detencións baséanse no informe e a denuncia presentada polo Decanato de Económicas, onde se sinalaba a sete estudantes da Universidade de Santiago.

Esta terceira detención prodúcese malia que os dous primeiros detidos polo mesmo motivo, Iago Barros e Serxio Piñeiro, xa prestaran declaración diante do xuíz o sábado pasado e o maxistrado decidira que saísen en liberdade con cargos. Segundo o colectivo Agir, ao que pertencen os dous primeiros detidos, o propio xuíz amosou o seu descontento coa actuación policial, toda vez que xa tiña estabelecida unha data para chamar a declaración aos mozos denunciados pola decana da Facultade.

No mesmo sentido, desde o Movemento polos Dereitos Civís quéixanse do trato de "delincuentes perigosos" recibido polos mozos cando "nin sequera a parte afectada presentou denuncia" e sen que haxa indicios de fuga. Ironizando ao respecto, pregúntanse desde o colectivo se por exemplo as forzas de seguridade aparecerán para levar detido ao alcalde de Vigo cando o fiscal desa cidade o chame a declarar polas tres denuncias que hai presentadas contra del.