Vieiros

Vieiros de meu Perfil


Edición xeral

RSS de Edición xeral
Escándalos na axencia espacial

Astronautas bébedos e sabotaxe na NASA

Unha web desvela que os tripulantes do transbordador espacial voaron baixo os efectos do alcol, ao tempo que se descobre que un traballador subcontratado cortou os cables dun computador.

Redacción - 17:49 27/07/2007

A axencia espacial estadounidense (NASA) estase a converter en protagonista dos medios de comunicación, pero non polos seus avances na investigación nin polos seus proxectos de futuro. Desta vez, estase a ver afectada por problemas ben terreais, aínda que se produzan a 360 quilómetros de altura. Por unha banda, sóubose que os astronautas da Estación Espacial Internacional voaron borrachos polo menos en dúas ocasións; por outra, descubriuse unha sabotaxe nos ordenadores do transbordador Endeavour.

Esta semana, a web de Aviation Week publicou que aos astronautas se lles permitiu voar bébedos polo menos dúas veces, a pesar da oposición dos seus compañeiros. Segundo a publicación, o estudo, encargado pola NASA para coñecer o estado de saúde dos astronautas, tamén detectou un abuso do alcol entre os profesionais nas doce horas posteriores ao despegue, o que vai contra as normas da axencia espacial. A NASA evitou facer declaracións sobre o asunto, pero anunciou que fará públicos os datos sobre a saúde dos astronautas.

Por se isto for pouco, descubriuse que un subcontratado cortou os cables dun ordenador do transbordador Endeavour, que ten previsto voar o 7 de agosto. Segundo as investigacións da NASA, foi un acto de sabotaxe, por ser intencionado e obvio. O aparello ía formar parte da cabina que vai transportar o persoal da Estación Espacial Internacional.

Segundo o voceiro da axencia Kyle Herring, o dispositivo está deseñado para recoller datos dos sensores externos da estación, que detectan vibracións, como as causadas polo impacto de micrometeoros. Aínda que confiou en que se repare a tempo, asegurou que se pode voar perfectamente sen el, pois os datos quedan almacenados nos propios sensores. Os danos considéranse o primeiro acto de sabotaxe no equipamento de voo descuberto pola NASA.


3.75/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: