Vieiros

O campus, organizado polo Clube de Balonmán Rasoeiro e no que colabora a Federación Galega, será o primeiro destas características que se celebre en Galiza e ten como obxectivo a formación de xogadores e xogadoras de categoría infantil e cadete.

Case están esgotadas todas as prazas, porque os cativos e cativas do balonmán galego non queren deixar pasar a oportunidade de adestrar co ex seleccionador estatal, Juan de Dios Román, o entrenador do Pórtland San Antonio e o do ABC de Braga, Jorge Rito, ou o pivote internacional español Rolando Urios. Son tres das estrelas que entre o 30 de xuño e o 7 de xullo ensinarán o que saben aos pequenos matrioculados n'O Grobe.

Tamén van estar adestradores galegos como Víctor García "Pillo", do Teucro, e Quique Domínguez, do Octavio, que realizarán unha ou duas sesións de traballo práctico cos rapaces. Ademais, tamén haberá xogadores como Rolando Urios (Ciudad Real), Eduardo Domínguez e Cerillo (Octavio), Rafa da Silva e Dani Benaches (Teucro), e Begoña Fernández, xogadora galega internacional coa selección estatal e pivote no Elda de Alicante. Os xogadores falarán cos rapaces sobre as suas experiencias, as técnicas que empregan, os adestramentos...

Ademais de contaren con adestradores e xogadores de primeira liña, os rapaces e rapazas apuntados no campus van gozar tamén duns días de convívio, con excursións e actividades de lecer na vila meca, a carón da ría.