Vieiros

A equipa do Karpin Galicia vai disputar a súa primeira competición en Galiza o vindeiro xoves, nunha proba do calendario portugués: o Gran Premio Paredes Rota dos Móveis, que na súa segunda edición sae de Compostela, para cubrir na primeira xornada un percorrido de 191,7 quilómetros entre a capital e Vigo.

Nesta proba compiten para o Karpin Galicia David García, Enrique Salgueiro, Gaizka Lasa, Santos González, Serafín Martínez, Ramón Troncoso, Gonzalo Rabuñal e Gustavo Domínguez, dirixidos por José Ángel Vidal e Jesús Blanco Villar.

O Gran Premio Paredes Rota dos Móveis dispútase en catro etapas entre o 17 e o 20 de maio, e arrinca o Día das Letras da Praza do Obradoiro ás 10:25 h., para terminar na Avda. Portanet de Vigo, á altura da bancada de río do estadio de Balaídos.

A segunda etapa sae de Vigo o venres, de mañá e conclúe na vila portuguesa de Maía, despois de cubrir un itinerario de 194,4 quilómetros. As dúas etapas que aínda fican hanse celebrar en terras portuguesas, entre a vila de Maia, Rebordosa, O Porto e Lordelo.

Nesta competición participan dezaoito equipas, entre elas, seis estatais: Relax-Gam, Euskaltel–Euskadi, Nicolás Mateos, Orbea-Oreka, Spiuk-Extremadura e Karpin Galicia.