Vieiros

Desde os sindicatos e diversos colectivos de defensa dos dereitos humanos fanse chamamentos á fin da violencia nas rúas, pero ao tempo pídeselle ao goberno que amose a súa vontade dun verdadeiro cambio nas súas políticas sociais. Do mesmo xeito, diversos colectivos islámicos franceses pediron "unha man tendida" para rematar coa vaga de violencia.

O balanzo policial deica o momento é de algo máis de 1400 coches queimados, preto de medio milleiro na propia capital francesa, 395 detidos, tres ducias de policías e 5 bombeiros feridos e 5 civís tamén feridos. Na mesma xornada, coñeceuse tamén do primeiro morto desde o comezo da revolta, un veciño de 61 anos da localidade de Stains no que varias persoas bateran logo de tentar apagar un lume nunha rúa e que permanecía en coma no hospital dende aquela.

Ao tempo, coñeceuse tamén este luns de sucesos parecidos durante a madrugada do día anterior en Bruxelas e Berlín.En cada unha das dúas cidades atopáronse media ducia de coches aos que lles prenderan lume durante a noite. Os casos aconteceron en barrios semellantes aos lugares onde abrollaron as revoltas en Francia, áreas con elevado grao de poboación nova, alto nivel de inmigración, baixos ingresos e forte desemprego, malia que desde as administracións respectivas belga e alemá cualifican o acontecido de casos illados.