Vieiros

O concello de Ferrol fixo público un comunicado no que mostra o seu pesar polo falecemento do xeneral Gabeiras, que "en momentos difíciles da historia recente do país, soubo demostrar a súa valía profesional e o seu valor como persoa".

Nos últimos anos, José Gabeiras púxose á fronte do movemento cidadán contra a instalación dunha planta regasificadora na ría de Ferrol. O Comité Cidadán de Emerxencia para a Ría de Ferrol tamén recoñeceu nun comunicado o seu "exemplo na defensa das liberdades, a xustiza, o medio ambiente e da súa terra".

O propio Comité acordou o 4 de xaneiro en sesión urxente ratificar a Gabeiras presidente de honra da entidade in aeternum, e continuar co seu legado de preocupación polo noso patrimonio natural. O Comité Cidadán de Emerxencia acordou, asemade, organizarlle un acto de homenaxe cidadán e promover unha recollida de sinaturas para que a Xunta de Galicia cumpla a lei establecida en materia ambiental.

Outra das liñas de traballo establecidas marca a petición de que Concello coloque unha placa na casa natal de José Gabeiras, organice unha homenaxe institucional e lle dedique unha rúa da cidade ao finado. O tenente xeneral José Gabeiras recibiu sepultura este luns no cemiterio de Cervás, en Ares.