Vieiros

Desde a Sociedade Estatal de Participacións Industriais afirman non ter proxectos inmediatos para o estaleiro de Fene, integrado en Navantia, e subliñan a "satisfacción" coa carga de traballo e ocupación actual. Paradoxalmente, o propio presidente da SEPI, Enrique Martínez Robles, recoñecera en decembro pasado, durante unha comparecencia na comisión de Economía do Congreso, que non se está utilizando toda a superficie dispoñíbel e que podería destinarse ese espazo a actividades alén da construción naval. Contestáballe Robles daquela a unha pregunta do deputado nacionalista Francisco Rodríguez, quen se queixaba da "infrautilización" das instalacións.

A necesidade de corrixir esa "infrautilización" levouna a primeiro plano a Consellaría de Innovación xa na altura de novembro de 2005, cando propuxo constituír unha comisión para o desenvolvemento do sector naval en Ferrolterra. A proposta por escrito chegou a Madrid un mes máis tarde, malia que a SEPI ignorou o convite.

En setembro, a Xunta convoca finalmente á reunión, e unha vez máis, a SEPI rexeita asistir á xuntanza. Nese foro, a consellaría presenta o borrador do proxecto, deixándoo aberto ás achegas dos axentes sociais. Antes de coñecer polo miúdo a proposta, a SEPI presenta xa un comunicado oficial onde descualifica a iniciativa e mesmo asegura que pode "poñer en perigo" o futuro de Navantia.

Problemas "inexistentes"
Desde a SEPI insisten en que o proxecto da Xunta "ignorou" que o estaleiro de Ferrol-Fene está integrado en Navantia, con "prohibición expresa" para a realización de calquera tipo de construción civil até o ano 2015.

A argumentación é rexeitada desde a Consellaría de Industria xa que, segundo explican, o documento presentado en ningún momento se pronuncia sobre a posibilidade da privatización e menos aínda sobre o potencial uso privado dos predios non utilizados pola factoría na actualidade.

A Consellaría de Innovación xa pediu cita coa Comisión Europea, para tratar do asunto directamente coa comisaria da Competencia, Neelie Kroes, e desbloquear a situación garantindo o futuro do naval en Ferrolterra.