Vieiros

"O Rei, ese subnormal xenético, que se supón debe garantir todos os dereitos mais, sobre todo, a unidade de España e a de todos os seus homes e as súas terras, ese si que debe estar contento, pois tras consumar a súa traizón a unha Nación e a un pobo, permitiu todo o que está ocorrendo, como o asasinato -que el sancionou coa súa sinatura de bébedo- de 80.000 nenos ao ano aínda no seo das súas nais, a eutanasia pasiva e a legalización dos matrimonios homosexuais". Quen asina estas palabras é o intelectual e político da ultradereita española Ricardo Sáenz de Ynestrillas, que facía públicas estas opinións no seu blog. Porén, o fiscal xefe da Audiencia Nacional, Javier Zaragoza, aínda non tivo a ben presentar acusacións contra este home por proferir "expresións vexatorias, humillantes, atentatorias contra a dignidade e a honra" do rei. Pola contra, si que o fixo dilixentemente por idéntico motivo contra os autores do artigo e caricatura Las tribulaciones del oso Yogui, que publicaron os diarios Gara e Deia o pasado novembro.