Vieiros

Logo de meses de espera, a conselleira Ánxela Bugallo adiantou a reformulación que fará o bipartito da Cidade da Cultura. Segundo precisou, serán tres unidades "diferentes e conformadas" que ocuparán, cada unha delas, dous edificios.

O primeiro bloque estará conformado pola Biblioteca e polo Arquivo Nacional de Galiza. Bugallo afirmou que "van ser dous edificios cabeceira do servizo nacional bibliográfico. O lugar onde exista o catálogo único de todas as bibliotecas de Galiza, onde se poida transferir todo o coñecemento relativo a ese enorme legado bibliográfico e documental que conforma a nosa propia cultura".

A segunda área estará composta polo Centro de Ciencias de Conservación do Patrimonio e polo Museo de Historia de Galiza. O primeiro edificio será, segundo a conselleira, un referente europeo pola aplicación de novas tecnoloxías. O Museo da Historia concíbese como "unha tarxeta de presentación da Galiza actual".

Por último, a terceira unidade estará conformada polo Centro de Arte Internacional, que poñerá á Cidade da Cultura no "circuíto de arte internacional actual". Haberá convenios cos principais museos do mundo para traer exposicións. Neste mesmo bloque temático atoparase o Centro Obradoiro que se concibe como un "centro de recursos propios para as artes escénicas, visuais e musicais de Galiza". O mesmo complexo terá un museo dedicado aos nenos, un centro lúdico-educativo no cal se traballará "na educación en valores e na creación artística dirixida especialmente a nenos de entre 3 e 12 anos", dixo Bugallo.

Referencia internacional
O presidente da Xunta, Emilio Pérez Touriño, cre que a Cidade da Cultura vai estar entre as dez grandes infraestruturas culturais do mundo. Segundo sinalou, o Centro de Arte Internacional vai estar ao nivel do Guggenheim de Bilbao ou da Tate Gallery de Londres. Touriño di que estes contidos van posibilitar que máis de 800.000 persoas visiten cada ano a Cidade da Cultura. Esta mesma semana, o goberno explicará os plans no Parlamento.