Vieiros

Para a Federación os talleres auxiliares son "uns heroes que están aguantando o tipo fronte a unha competencia desleal". Pablo García asegura que non se pode cargar contra estes talleres e sinala que o que necesita o sector é unha forte aposta institucional. "No caso galego, a Xunta ten que apoiar o téxtil contra vento e marea".

O presidente da Fedecon pon como exemplo o caso de que o goberno galego non esixa que o seu propio inventario téxtil sexa confeccionado en Galiza. "Cóntanse por millóns as pezas de uniformes para o persoal sanitario, policía ou traballadores en xeral que se fabrican fóra" sinala García. Outra das posíbeis solucións que valora é reducirlles a carga impositiva ás partidas fabricadas na comunidade ou sobre o mesmo imposto de sociedades.

Para os empresarios tamén é importante que se recoñeza o carácter temporal do téxtil. "Igual que outros sectores, contamos cunha gran temporalidade. Temos unha forte carga de traballo en meses determinados e é necesario regular esta circunstancia".

"Limitar as importacións é poñer portas ao campo, necesitamos apoio institucional"
Desde a patronal recoñécese que é imposíbel limitar por máis tempo as importacións asiáticas. "As accións de apoio non se poden centrar en prohibir o intercambio co mercado chinés, en parte porque hai moitos outros países que están a competir ao mesmo tempo". Pablo García sinala que o actual acordo co ministro de Exteriores chinés para limitar as importacións freou un pouco o crecemento, pero dun xeito temporal. "Limitar as importacións é poñer portas ao campo, necesitamos apoio institucional".

Segundo García, o peche progresivo destes pequenos talleres vai ir sempre en contra do sector. "De seguir así, en anos non teremos talleres onde facer series curtas e de calidade, o que repercutirá na competitividade final do téxtil galego".