Vieiros

Mercedes López sinala que desde Comisións Obreiras xa se lle achegou á Consellaría de Industria unha proposta para a convocatoria da mesa. "O obxectivo é por en marcha en Galiza o Plan de Apoio ao Téxtil, que xa funciona en comunidades como Cataluña, Madrid ou Valencia". Do plan espérase un maior investimento en axudas aos pequenos talleres, unha mellora das condicións para a creación de emprego e o desenvolvemento de actividades formativas para as traballadoras.

Aínda así, a sindicalista non esquece a responsabilidade das "doce grandes" empresas do sector: "durante anos recibiron miles e miles de millóns en subvencións e agora que son xigantes externalizan a produción. Todas teñen en certo punto responsabilidade á hora de decidir marchar".

Aposta de futuro
Segundo Mercedes López, o futuro do sector en Galiza pasa por apostar forte en tres frontes: a calidade como sinal de identidade, a defensa das marcas e un maior investimento en deseño e a creatividade.

No referido á situación de precariedade das empregadas sinala que hai moita diferenza entre traballar para un taller auxiliar ou para unha empresa grande como Inditex, Caramelo ou Adolfo Domínguez. "Son dous modelos de empresa moi diferenciados, sobre todo desde o 2000", data en que se asinou o Convenio Colectivo Estatal. "Desde daquela os grandes grupos coidan máis a subcontratación. Vixían máis en mans de quen poñen os seus encargos".