Vieiros

O goberno subliña que coa entrada en funcionamento deste proxecto Galiza contará por vez primeira cunha capacidade de resposta "global e eficaz" contra a contaminación mariña. O presidente da Xunta destacou a creación do chamado Centro de Coordinación Operativa, "un órgano de dirección que funcionará baixo o mandato do conselleiro de Presidencia no que se integran as consellarías de Pesca, Política Territorial e Medio Ambiente", ademais de todos os organismos responsábeis que teñan algo que ver coa resposta ante unha situación de contaminación marítima, ben sexa por un buque en altamar, ou por vertidos froito de accidentes en factorías a pé de costa. En caso necesario inclúe tamén a intervención das consellarías de Innovación e Industria, Sanidade e Economía.

O Plan fai repaso dos medios, humanos e materiais, que sería necesario despregar diante dun accidente deste tipo, e avalía a resposta máis axeitada en cada caso tendo en conta as especiais características das costas galegas. O proxecto inclúe a creación de Grupos Operativos de Protección Civil, de Resposta en Terra e de Resposta en Mar, e dunha Unidade de Apoio Loxístico, ao tempo que estabelece un programa de adestramentos e simulacros para ampliar a eficacia da resposta fronte a crises. Ademais, prometen sometelo a revisión cada dous anos para incorporar calquera modificación condicionada por avances tecnolóxicos e axustes froito da experiencia acumulada e is posíbeis cambios lexislativos.