Vieiros

Das palabras do presidente da Xunta, Emilio Pérez Touriño, este xoves á saída do Consello da Xunta, extráese a convicción de que a negociación entre o goberno galego e o español para o traspaso das competencias en tráfico vai para longo. Desde a vicepresidencia da Xunta, subliñaran o carácter prioritario respecto a esa demanda en concreto, apremando ao executivo a dialogar sobre o asunto. Porén, o presidente Touriño di agora non ver urxencia na demanda, que enmarcou nos propios "ritmos" que o goberno galego vaia establecendo no despregue da Policía Galega, que no futuro asumiría esas competencias viarias.

Na resposta do goberno a Francisco Rodríguez, deputado do BNG no Congreso, inclúese o gasto da xefatura de Tráfico en Galiza no período 2001-2005, cantidade que ascendeu a 26.3 millóns de euros e que se gastou exclusivamente en adquisicións de material técnico e tecnolóxico. Nese período a Dirección Xeral de Tráfico ingresara aquí un total de 173.2 millóns de euros a través de taxas e sancións. De paso, o goberno Zapatero aproveita para subliñar unha vez máis a súa negativa á transferencia destas competencias a Galiza, argumentando que "a política de seguridade viaria debe ser única para todo o territorio estatal".