Vieiros

Sancións "criminais efectivas, proporcionadas e disuasorias". Nesa liña vai a intención da Comisión Europea, que quere afondar nas iniciativas que melloren o cumprimento da lexislación xa existente sobre transporte marítimo de residuos e estimular os esforzos entre os Estados membros no control da situación actual.

O Consello Europeo de Medio Ambiente tivo xuntanza esta semana e o tráfico marítimo de sustancias perigosas apareceu en lugar destacado da axenda, máis aínda despois do recente accidente protagonizado polo buque Probo Koala, que logo dun traxecto que o levou a través de diversos portos europeos, causou unha grave catástrofe en Costa do Marfil, onde deixou milleiros de intoxicados polos seus vertidos e unha ducia de mortos.

Cara ao control e seguimento estreito dos buques perigosos
A xuntanza dos ministros europeos con responsabilidades vencelladas serviu ademais para consensuar a posición da UE fronte á próxima reunión da Convención Basel, do programa de Medio Ambiente das Nacións Unidas, onde se tratará dos problemas das exportacións de produtos tóxicos e da importancia de debater sobre delitos ecolóxicos que a miúdo afectan conxuntamente a varios países. De xeito concreto vaise propoñer o reforzo do sistema de seguimento de tráfico marítimo de mercadorías perigosas, coa fin de que as iniciativas a nivel da UE sexan incorporados pola Organización Marítima Internacional.

A ameaza do 'Probo Emu'
Co accidente de Costa do Marfil na memoria recente, coincide o paso por augas atlánticas do Probo Emu, buque similar ao que causou o sinistro no país africano. O eurodeputado galego do PP, Daniel Varela, presentou pregunta na UE sobre o buque en cuestión, pedindo explicacións sobre os portos comunitarios por onde xa estivo e avisou que os movementos deste barco son "preocupantes" e "sospeitosos".