Vieiros

"É un proxecto cunha forte carga simbólica", explicou o presidente da Xunta no Parlamento, indicando que será "un elemento de especial dinamización do autogoberno" e máis "nun momento onde se deben buscar mecanismos que permitan fortalecer o marco autonómico cara a reforma do Estatuto". Ao tempo defendeu que os primeiros pasos cara esta policía galega foran dados no seu momento "polo goberno tripartito presidido polo presidente socialista Fernando González Laxe". Emilio Pérez Touriño explicou que "en ningún modo se trata de eliminar a presenza doutros corpos de seguridade do Estado", pero recoñeceu que o proxecto inclúe un modelo de integración voluntaria dos efectivos de Policía Nacional e Garda Civil.

A intervención de Touriño chegaba en resposta á pregunta do BNG sobre os prazos manexados para a entrada en funcionamento do corpo policial galego. Sobre o tema, o voceiro do BNG na Cámara, Carlos Aymerich, comentou que o goberno galego deber darlle "un impulso a unha política que integre a prevención e o mantemento da seguranza cidadá, entendida como unha situación en que os dereitos e liberdades poden exercerse sen coacción". "Queremos unha policía galega integral que vaia sustituíndo progresivamente ás forzas de seguridade do Estado", expuxo Aymerich, laiándose de que deica agora "houbo unha certa doutrina asentada segundo a cal Euscadi e Cataluña podían ter a súa policía e os demais se a queren que a paguen".