Vieiros

Rouco Varela non vive os seus mellores tempos como xerarca da igrexa. Un crime acontecido entre os anos 1998 e 2001 na parroquia de Santo Domingo Guzmán pode truncarlle a súa meteórica carreira. A asociación Iglesia sin Abusos considera que o relixioso galego e outros xerarcas do Arcebispado, unha vez coñecido o escándalo, intentaron minimizar o impacto social do mesmo. Para iso, segundo este colectivo, quixeron amañar o asunto desde dentro e evitar así a xudicialización e coñecemento público do crime.

Segundo a acusación particular, os abusos terían acontencido na sacristía do templo. O acusado protagonizaría encontros coa vítima de doce anos, co consentimento dos pais, para axudarlle coas tarefas escolares ao neno. O rapaz sufría unha dislexia. Rafael Sanz negou todas as acusacións diante do tribunal. Asegurou que estaba co neno na sacristía porque alí se atopa o computador.

A acusación solicita sete anos de prisión para o párroco e que se indemnice á familia con 90.000 euros. Tamén esixe que se pene á cúpula eclesial, pola súa responsabilidade civil, por "criar obstáculos para a investigación". Se finalmente esto se producira, a igrexa só pode ser sancionada con multas e aperturas de expedientes. É a primeira vez que a igrexa, como institución, ten que responder por unha actuación criminal.

Sexa como for, o caso está tendo moita expectación internacional. Empresas como a BBC cubren extensamente a noticia para países como Portugal ou Brasil. As referencias mediáticas dentro do estado español a este feito son moi escasas. No 2004, a cadea radiofónica Ser deu en exclusiva que estaba presentada unha denuncia contra o relixioso e que na familia do neno había malestar pola postura do arcebispo no caso.