Vieiros

Na pasada década a historia do Couto Mixto comezou a ser coñecida e reivindicada por distintas institucións, personalidades e veciños. Así, no 2002 constituíuse legalmente a Asociación de amigos do Couto Mixto, de carácter cultural, que se apoia nos estudos do historiador da zona Luís Manuel García Mañá, e en documentación gardada pola propia asociación.

Pero a iniciativa socialista quere ir máis alá e tratar de paliar a decadencia do Couto Mixto -composto polas aldeas de Santiago, Rubiás e Meaus, pertencentes aos concellos de Calvos de Randín e Baltar-, implicando as distintas institucións para a dinamización estratéxica da zona. O PSOE planea impulsar unha serie de actuacións para as que, din, precíase o soporte do recoñecemento desa singularidade político-administrativa de carácter histórico, sen efectos xurídicos na actualidade. Segundo a proposta presentada por Alberte Fidalgo, esta medida serviría como "motivación" para que a Xunta e o Estado concertasen estas actuacións en áreas como cultura, agricultura, desenvolvemento rural e programas comunitarios transfronteirizos.

Blogueiros das dúas beiras reivindican a independencia do Couto
A conto do impulso político e mediático provocado por esta iniciativa, varios blogueiros de Galiza e Portugal xa se pronunciaron sobre o tema, indo máis alá do recoñecemento á "singularidade" e reclamando directamente a independencia do Couto Mixto. No blog portugués Renas e Veados apostan por un micro-estado ao estilo de Mónaco ou San Marino, que sería moi beneficioso dende o punto de vista turístico e económico. En Nemeth secundan a moción e pregúntanse polas oportunidades que tería o idioma galego de chegar á ONU ou a Eurovisión da man do Couto Mixto.

Tamén recomendan o libro que sobre o Couto Mixto publicou recentemente García Mañá con fotografías de Xurxo Lobato, moitas das cales se poden ver na súa galería.