Vieiros

Egeland denunciou que se ben a Convención de Xenebra non prohibe totalmente o seu uso, xa que o admite contra obxectivos militares, os explosivos deste tipo atopados polos investigadores da ONU están sobre todo en áreas civís, afectándolle a case catrocentos núcleos de poboación libaneses e nun número que podería chegar ás cen mil unidades.

As bombas en acio son especialmente perigosas porque conteñen ducias de explosivos máis pequenos, que ademais pola súa cor poden confundirse facilmente coa terra, con vexetación ou con pedras, e que unha persoa non está segura fronte a elas nun radio de ata trinta metros. Jan Egeland acusou ao exército israelí de sementalas por todo o país conscientemente do dano que provocarán, laiouse da dificultade para atopar e desactivar estas bombas e agoirou que despois do recente conflito poderían morrer milleiros de persoas debido a eses explosivos.