Vieiros

O voceiro do grupo parlamentario do BNG, Carlos Aymerich, lembraba na tarde deste luns que diante das acusacións insinuadas polo vicepresidente da Xunta e voceiro nacional do Bloque, Anxo Quintana, a pasada fin de semana, sobre a presunta deslealdade de alcaldes do PPdeG na loita contra os incendios, houbo rexedores que "parece que se deron por aludidos", e citou entre outros aos de Cerdedo e Soutomaior, e ao propio presidente da Federación Galega de Municipios e Provincias e alcalde de Lalín, Xosé Crespo. Desde o Bloque aseguran tamén que a Xunta dispón de informes elaborados polo propio executivo anterior de Manuel Fraga, onde se recolle a recomendación de non asignarlles brigadas municipais a determinados concellos con goberno do PP pola súa "probada incompetencia" na xestión destas.

Aymerich afondou no que os nacionalistas cualifican de graves irresponsabilidades destes mandatarios e referiuse por exemplo ao alcalde de Barro, poñéndoo de exemplo da actitude dos alcaldes populares aos que acusou de "manter as motombombas pechadas baixo chave" en almacéns municipais mentres o lume zoupaba nos montes próximos. Ao tempo, Carlos Aymerich dixo agardar que a comisión parlamentaria sobre os incendios sirva tamén para a análise do acontecido. "O PPdeG usa as institucións onde goberna para facer oposición, politiquería barata e renuncia ás súas responsabilidades", denunciou o coordinador da executiva do BNG, Francisco Jorquera. Na súa opinión, durante a crise dos incendios o PP amosou unha actitude "irresponsábel e vergonzosa". Jorquera cualificou de "escándalo" os obstáculos postos por rexedores populares á loita contra o lume e criticou que o propio presidente da Fegamp, ao que definiu de "hooligan", alentase agora as críticas dos alcaldes do PP ao executivo.

Os nacionalistas galegos láianse por exemplo asegurando que houbo casos como o dun Concello coruñés do PPdeG que se negou no seu momento a asinar o convenio para o establecemento dunha brigada, e onde durante un incendio, efectivos municipais de Protección Civil renunciaban a levar material de extinción dicindo que "era deles" e argumentando que a Xunta non lles dera este ano brigada, resistíndose a enviar a motombomba municipal. O mesmo alcalde falaba despois con belixerancia para os medios criticando que a culpa de que o lume estivese preto das casas fora da ineficacia do operativo da Xunta. Desde o BNG inclúen tamén na denuncia a concellos pontevedreses gobernados polo PPdeG "onde non se permitiu a saída dos camións de bombeiros" ou mesmo se chegou a impedir que unha motombomba da Xunta cargase auga nunha piscina municipal.

Ao respecto da polémica, o secretario de Política Municipal do PsdeG, Manuel Lagares, renunciaba a entrar no enfrontamento e aseguraba que os socialistas "non comparten" as acusacións e que non teñen "nada que reprocharlles" aos alcaldes do PPdeG. Asegurou Lagares que os alcaldes "puxeron o mellor de si mesmos" para combater a vaga de lumes.