Vieiros

O representante do PpdeG reparou especialmente nos temas asistenciais, considerando que os emigrantes galegos "están vivindo unha situación de desamparo por mor da mala xestión das administracións". Concretamente, falou do asunto das pensións, explicando que os galegos residentes no extranxeiro están vendo reducidas "de maneira substancial" estas prestacións, que quedan equiparadas en moitos casos "ás dos países onde residen". "Esta situación lévaos a convertelo en cidadáns de segunda, con menos dereitos que os cidadáns residentes no territorio español", opinou.

Miras Portugal destacou tamén a necesidade de que os emigrantes "computen a nivel de financiación autonómica, xa que de feito son as comunidades autónomas as que están dándolles asistencia, debido ao abandono de funcións do goberno do Estado". Por outro lado, referiuse ao "importante papel xogado polos centros galegos no exterior como axentes pioneiros e imprescindibles no proceso de pervivencia dos elementos culturais e de axuda a colectividade". O representante do PP reflexionou que as potencialidades destes centros non estarían sendo aproveitadas, desbotando "coñecementos" e "mecanismos de actuación" pioneiros. Por último, salientou tamén a proposta de que se amplíen medios para a formación cultural de mozos e descendentes de emigrantes galegos, "coa fin de acadar unha extensión maior da galeguidade nos países onde estes residen".